26 Ebrill 2001

Prif grantiau wrth fodd Gogledd Cymru

Mae'r Gronfa Gymunedol wedi cyhoeddi'r gyfres gyntaf o Grantiau bychain dan ei henw newydd ac mae grwpiau ledled y wlad yn cael eu hannog i wneud cais am gyllid y loteri i gefnogi eu gweithgareddau yn y gymuned.

Mae Prosiect Ieuenctid Dinbych sy'n darparu cyngor, cefnogaeth, gwybodaeth a gweithgareddau hamdden i bobl ifanc, yn dathlu wedi iddo gael grant o £165,393 ar gyfer costau cyflogau, offer swyddfa, costau hyfforddiant a chynnal a chadw yn gyffredinol.

Mae'r Prosiect, a gychwynnodd yn Rock House ym 1996, yn agored i bob person ifanc ac mae'n fan cyswllt gwerthfawr yn y gymuned sy'n cynnig dewis eang o wasanaethau i bobl ifanc 14 - 25 oed. Bydd ar agor bob diwrnod gwaith o 9.30am tan 3.30pm ac ar nosweithiau Mawrth a Mercher. Y llynedd yn unig, cafodd mwy na 1,000 o bobl ifanc elw ohono.

Trwy gydweithio â cholegau, ysgolion a nifer helaeth o asiantaethau cymunedol, mae'r prosiect yn gallu cynorthwyo i dywys pobl ifanc wrth iddynt wneud rhai o'r penderfyniadau anodd yn ystod eu bywydau a darparu hafan glyd a diogel ar gyfer amser personol a gweithgareddau hamdden.

Meddai Sue Parry, Cydlynydd y prosiect: "Rydym yno i fod yn fan cyswllt i bobl ifanc, yn ogystal â chynnig lle iddynt ymlacio. Gallwn roi help i bobl ifanc sydd ag ymholiadau neu broblemau, i gysylltu â'r sefydliadau perthnasol sy'n gallu rhoi cymorth iddynt. Yn ogystal â hyn mae gennym gyfleusterau fel cyfrifiaduron, mynediad i'r rhyngrwyd, cerddoriaeth, teledu a llawer o sesiynau diddorol; er enghraifft rydym yn gobeithio dechrau dosbarth hunanamddiffyn cyn bo hir."

"Bydd yr arian hwn yn gwneud gwahaniaeth aruthrol i ni. Bydd yn golygu ein bod yn gallu cyflogi rhagor o staff ac ymestyn y gwasanaethau sydd ar gael i bobl ifanc yn yr ardal. Mae'n adeg ddelfrydol i ni gael yr arian hwn," ychwanegodd Sue.

Mewn mannau eraill yng Ngogledd Cymru, mae sefydliadau eraill wedi elwa ar gyfres ddiweddaraf y prif grantiau hyn. Ar hyd a lled y wlad mae 18 sefydliad yn rhannu cyfanswm o £3,227,605.

Bydd Cyngor Gwirfoddol Lleol Sir y Fflint yn derbyn £330,181 dros dair blynedd i sefydlu dwy ganolfan adnoddau yn Y Fflint a Glannau Dyfrdwy i ddarparu gwybodaeth a chefnogaeth i grwpiau cymunedol a gwirfoddol.

Yng Ngwynedd, bydd grant o £96,326 i adnewyddu Neuadd Bentref Aberangell yn gwella'r cyfleusterau cymdeithasol i'r gymuned leol, ac ar Ynys Môn bydd £110,776 i adnewyddu Neuadd Bentref Llanfaelog yn cynnwys gosod mynediad llawn i bobl ag anabledd.

Ar hyd a lled Cymru, dyfernir £130,474 i Gymdeithas Iselder Gorffwyll i recriwtio a hyfforddi gwirfoddolwyr i ddatblygu rhwydwaith grwp y Gymdeithas a bydd Fforwm Cymru Gyfan y Rhieni a'r Gofalwyr yn cael £288,825 i ddarparu cefnogaeth, hyfforddiant a gwybodaeth i rieni a gofalwyr plant sydd ag anableddau.

Dosbarthwyd cyfanswm o dros £113 miliwn i grwpiau gwirfoddol gan y Gronfa Gymunedol yng Nghymru (Bwrdd Elusennau'r Loteri Genedlaethol gynt) i fynd i'r afael â thlodi a hybu cymunedau i gymryd rhan.

Dylai grwpiau sydd eisiau ffurflenni cais neu wybodaeth ychwanegol ffonio: 0845 791 9191 (Saesneg) neu 0845 727 3273 (Cymraeg).

Nodiadau i Olygyddion:

1. Am ymholiadau cyfryngau neu rifau cyswllt grwpiau, cysylltwch â Debbie ar 01352 700208
2. Mae'r Gronfa Gymunedol yn sefydliad annibynnol a ffurfiwyd gan y Senedd i ddosbarthu arian er mwyn cefnogi cymdeithasau elusennol, llesiannol a dyngarol. Mae 17 aelod o'r Bwrdd, yn cynnwys y Cadeirydd. Mae penderfyniadau am grantiau yn cael eu gwneud gan yr aelodau mewn pwyllgorau grantiau yng Nghymru, Lloegr, Yr Alban, Gogledd Iwerddon a'r DG gyfan.
3. Mae grantiau'r Gronfa Gymunedol yn cael eu dyfarnu gan Bwyllgor Cymru. Aelodau'r Pwyllgor yng Nghymru yw Elisabeth Watkins (Cadeirydd), Jeff Carroll a Rhiannon Bevan. Aelodau cyfetholedig i'r Pwyllgor yw Margaret Davies, Aled Siôn a Dr Glyn Williams.
4. Prif nod y Gronfa yw rhoi grantiau i helpu'r rhai mwyaf difreintiedig mewn cymdeithas ac i wella ansawdd bywyd yn y gymuned.
5. Ers Hydref 1995, mae'r Gronfa Gymunedol, o dan y prif grantiau, wedi dyfarnu dros £107 miliwn i 1068 o grwpiau yng Nghymru. Mae dros £5.7 miliwn wedi ei ddyfarnu i 2,077 o grwpiau o dan y Cynllun grantiau bychain. Golyga hyn bod y cyfanswm a ddosbarthwyd, dros gyfnod o bum mlynedd, yn fwy na £113 miliwn.
6. Mae rhestrau llawn o grantiau'r Gronfa Gymunedol ar y rhyngrwyd ar www.community-fund.org ac mae rhestrau llawn o holl ddosbarthwyr grantiau'r Loteri wedi eu rhestru ar www.lottery.culture.gov.uk.

Nodyn i Ddylunwyr

Logo'r Gronfa Genedlaethol yw'r logo sy'n ymddangos ar y datganiad i'r wasg yma. (Mae'r logo "bysedd wedi eu croesi" yn arwyddnod i'r Loteri Genedlaethol ac felly nid yw ar gyfer defnydd y Gronfa Gymunedol).