12 Medi 2000

Grantiau'r Bwrdd Elusennau ar gael yn gynt

Bydd Bwrdd Elusennau'r Loteri Genedlaethol yng Nghymru yn prosesu a dyfarnu Grantiau bychain yn llawer cynt o hyn allan, ac yn sgil hynny bydd arian ar gael i ymgeiswyr llwyddiannus yn llawer cyflymach nag y bu yn y gorffennol.

Dywedodd Roy Norris, Cyfarwyddwr y Bwrdd Elusennau yng Nghymru: "Gwyddwn ers tro nad yw arian yn cael ei drosglwyddo i grwpiau mor gyflym ag y dylai gan fod ceisiadau'n pentyrru'n sydyn. Yn dilyn arolwg o'n dulliau prosesu a dyfarnu Grantiau bychain, hyderwn bod gennym bellach system gyflymach a mwy effeithlon er budd i bawb."

Yn y rownd ddiweddaraf o Grantiau bychain yng Nghymru a gyhoeddwyd gan y Bwrdd heddiw, rhennir cyfanswm o £365,465 rhwng 110 o fudiadau. Bydd plant, pobl ifanc, henoed a grwpiau i bobl sy'n anabl yn gorfforol a meddyliol yn elwa o'r grantiau.

Yng Nghaerdydd, bydd Cymdeithas Tenantiaid a Phreswylwyr Llys Oldwell yn derbyn £3,500 er mwyn darparu cyfrifiadur a chyswllt â'r rhyngrwyd i henoed sy'n byw mewn llety lloches, ac yng Nghonwy, dyfarnwyd £2,000 i Gymdeithas Gwarchod Cymdogaeth Sir Conwy. Bydd yr arian yn cael ei ddefnyddio i hyrwyddo atal trosedd yn yr ardal.

Er mwyn gwella eu sgiliau a helpu i ddenu aelodau newydd, dyfarnwyd £1,678 i Glwb Gwau Bedwas, ac ym Mlaenau Gwent caiff Eglwys Fethodistaidd Cwmcelyn £4,900 er mwyn adfer darn o dir gwastraff sydd wrth ochr yr eglwys.

Yn Sir y Fflint, bydd Pwyllgor y Mileniwm Caerwys yn derbyn £5,000 er mwyn darparu system sain gymunedol yn cynnwys system ddolen cymorth clywed i'r byddar, ac yng Ngwynedd dyfarnwyd £4,899 i Gymdeithas Gwenyna Llyn ac Eifionydd er mwyn cynyddu ymwybyddiaeth pobl o wenyna a rôl gwenyn yn yr amgylchedd.

Bydd Gwefan Gymunedol Caldicot yn derbyn £4,991 er mwyn darparu hyfforddiant i grwpiau cymunedol, a bydd grant Cymorth i Ferched Cwm Lliw o £3,757 yn talu am ddodrefn ar gyfer lloches i ferched.

Dyfarnwyd £3,500 i Gynllun Dodrefn Cymunedol Phoenix yn Sir Fynwy er mwyn gwella'r adeilad ailgylchu, ac fe gaiff Cyngor Henoed Gorllewin Morgannwg yn Abertawe £4,968 i lunio llyfryn gwybodaeth ar gyfer pobl hyn yn yr ardal.

Dyfarnwyd swm o £4,965 i ehangu gweithgareddau yng Nghanolfan Ieuenctid Cwmbran, ac yn ardal Wrecsam bydd grant o £2,750 yn cael ei ddefnyddio i ddarparu deunydd hyrwyddo, hyfforddiant ac offer TG ar gyfer Partneriaeth Gwersyllt.

Dylai grwpiau sydd am gael ffurflenni cais ar gyfer grantiau'r Bwrdd Elusennau neu ragor o wybodaeth ffonio 0845 727 3273.

Nodiadau i Olygyddion

1. Am ymholiadau'r wasg neu rifau cyswllt y grwpiau cysylltwch â Brian ar 01286 830438 neu 07880 5580361
2. Mae Bwrdd Elusennau'r Loteri Genedlaethol yn gorff annibynnol a sefydlwyd gan y Senedd i ddosbarthu arian i gefnogi mudiadau elusennol, llesiannol a dyngarol. Mae 17 aelod ar y Bwrdd, gan gynnwys y Cadeirydd. Dyfernir grantiau gan yr aelodau ar bwyllgorau grantiau ar gyfer Cymru, Lloegr, yr Alban, Gogledd Iwerddon a'r DG yn gyffredinol.
3. Dyfernir grantiau o dan ddwy brif raglen y Bwrdd Elusennau, Gweithredu cymunedol a Thlodi a difreintedd yn ogystal â Grantiau bychain, gan Bwyllgor Cymru. Aelodau'r Bwrdd yng Nghymru yw Elisabeth Watkins (Cadeirydd), Tom Jones a Jeff Carroll. Aelodau Cyf-etholedig y Bwrdd yw Margaret Dennis, Aled Siôn a Dr Glyn Williams.
4. Prif nod y Bwrdd yw dyfarnu grantiau i gwrdd ag anghenion y rhai mewn cymdeithas sydd fwyaf dan anfantais a gwella ansawdd bywyd yn y gymuned.
5. Er mis Hydref 1995, mae Bwrdd Elusennau'r Loteri Genedlaethol, o dan y prif raglenni grantiau, wedi dyfarnu mwy na £91 miliwn i 969 o grwpiau yng Nghymru. Dyfarnwyd dros £5 miliwn i 1,865 o grwpiau o dan y Cynllun grantiau bychain. Mae cyfanswm y grantiau a ddyfarnwyd yng Nghymru, dros bum mlynedd, oddeutu £100 miliwn.
6. Cyhoeddir rhestrau llawn o grantiau'r Bwrdd Elusennau ar ein safle ar y wê www.nlcb.org.uk a rhestir holl grantiau dosbarthwyr y Loteri ar y safle www.lottery.culture.gov.uk.