10 Mai 2000

Dyfarnu £7.5 miliwn i Gymru

Rhoddodd y Bwrdd Elusennau hwb o £7.5 miliwn i weithgareddau gwirfoddol sy’n trawsnewid bywydau yng Nghymru. Bydd y swm o £7,518,155 a ddyfarnwyd i 45 o brosiectau yn gwneud y byd o wahaniaeth i gymunedau. Dyfarnwyd £852,360 i brosiect ar gyfer yr anabl, y grant mwyaf a ddyfarnwyd erioed gan y Bwrdd Elusennau yng Nghymru.

Dywedodd Elisabeth Watkins, Cadeirydd y Bwrdd Elusennau yng Nghymru, "Bydd y byddar, y digartref, yr henoed, rhai sy’n gofalu am ddioddefwyr Alzheimer, merched duon a merched o gymunedau ethnig lleiafrifol, ymhlith eraill, yn elwa o’r prosiectau ar gyfer Cymru gyfan. Ein nod yw gwneud y prif raglenni grantiau mor amrywiol â phosibl er mwyn mynd i’r afael â Thlodi a difreintedd ac annog Gweithredu cymunedol."

Bydd Mewn Cymru yn defnyddio grant o £315,683 i fynd i’r afael â’r anfantais sy’n wynebu merched duon a merched o gymunedau ethnig lleiafrifol yng Nghymru trwy gynnwys addysg, hyfforddiant a meithrin hyder yn ogystal â chreu ymwybyddiaeth ymhlith penderfynwyr polisi.

O hyn allan, bydd gan yr henoed yng Nghymru lais uniongyrchol yn y Cynulliad Cenedlaethol, y Senedd a’r Senedd Ewropeaidd. Bydd grant Cyngor Henoed Cymru o £135,298 yn cyflogi Swyddog Materion Gwleidyddol a fydd yn tynnu sylw penderfynwyr polisi at faterion yn ymwneud â henoed.

Mae peryg i ofalwyr o fewn teuluoedd cleifion Alzheimer deimlo dan straen ac yn unig wrth iddynt ofalu’n feunyddiol am eu hanwyliaid er mwyn ceisio lleddfu rhywfaint ar eu dioddefaint. Bydd grant o £420,203 a ddyfarnwyd i’r Gymdeithas Alzheimer yn talu am sefydlu canolfan adnoddau newydd yn Ne Cymru i gefnogi’r gofalwyr hyn ac ysgwyddo peth o’u baich.

Mae anfanteision ychwanegol i bobl fyddar os ydynt wedi eu hynysu’n ddaearyddol neu oherwydd lefel incwm, diffyg mudoledd neu anabledd arall. Bydd y Sefydliad Cenedlaethol Brenhinol ar gyfer y Byddar yn defnyddio grant o £158,179 i sefydlu gwasanaeth allanol.

Dyfarnwyd £852,360 – y grant mwyaf a ddyfarnwyd erioed gan y Bwrdd Elusennau yng Nghymru – i Cyfle Cymru yng Nghaerdydd ar gyfer prosiect i ddarparu cyfleon hyfforddi i gannoedd o bobl anabl trwy greu unedau gweithdy yn cynnig profiad gwaith a hyfforddiant.

Dywedodd Roy Norris, Cyfarwyddwr y Bwrdd yng Nghymru, "Yn amlwg, mae £7.5 miliwn yn swm aruthrol o arian a fydd, os y’i defnyddir yn ddoeth, yn gwneud y byd o wahaniaeth i’r rhai dan anfantais yng Nghymru trwy weithredu annibynnol a gwaith gwirfoddol. Fel arfer, bu ein staff yn swyddfa’r Drenewydd yn asesu’r holl geisiadau a byddant yn parhau i fonitro datblygiad y prosiectau. Edrychwn ymlaen at weld y prosiectau hyn yn dwyn ffrwyth."

Y tro hwn, 35 y cant o’r ceisiadau fu’n llwyddiannus.

Dylai grwpiau sydd am gael ffurflenni cais ar gyfer grantiau’r Bwrdd Elusennau neu ragor o wybodaeth ffonio 0845 727 3273.

Nodiadau i Olygyddion

1. Ar gyfer ymholiadau’r wasg neu rifau cyswllt y grwpiau cysylltwch â Hanna 01248 679003 neu Geraint 01686 611705.
2. Mae Bwrdd Elusennau’r Loteri Genedlaethol yn gorff annibynnol a sefydlwyd gan y Senedd i ddosbarthu arian i gefnogi mudiadau elusennol, dyngarol a llesiannol. Mae 17 o aelodau ar y Bwrdd, gan gynnwys y Cadeirydd. Penderfynir ar grantiau gan yr aelodau ar bwyllgorau dyfarnu grantiau ar gyfer Cymru, Lloegr, yr Alban, Gogledd Iwerddon a’r DG gyfan.
3. Mae dwy brif raglen grantiau y Bwrdd Elusennau: Gweithredu cymunedol a Thlodi a difreintedd, yn ogystal â’r Grantiau bychain yn cael eu dosrannu gan Bwyllgor Cymru. Aelodau’r Bwrdd yng Nghymru yw Elisabeth Watkins (Cadeirydd), Tom Jones a Jeff Carroll. Mae Margaret Dennis, Aled Siôn a’r Dr Glyn Williams yn Aelodau cyfetholedig o’r Bwrdd.
4. Prif nod y Bwrdd yw rhoi grantiau i ateb anghenion y rhai mwyaf difreintiedig mewn cymdeithas ac i wella ansawdd bywyd yn y gymuned.
5. Er Hydref 1995, mae Bwrdd Elusennau’r Loteri Genedlaethol, o dan y prif grantiau, wedi dyfarnu bron i £91 miliwn i 969 o grwpiau yng Nghymru. Cafodd dros £4 miliwn ei ddyfarnu i 1,602 o grwpiau o dan y Cynllun grantiau bychain. Daw hyn â’r cyfanswm a ddosbarthwyd yng Nghymru, dros bum mlynedd, i ragor na £95 miliwn.
6. Cyhoeddir rhestrau llawn o grantiau’r Bwrdd Elusennau ar y rhyngrwyd ar www.nlcb.org.uk a rhestrir rhestrau llawn o holl grantiau dosbarthwyr arian y Loteri ar www.lottery.culture.gov.uk.

Nodyn i Ddylunwyr

1. Logo Bwrdd Elusennau’r Loteri Genedlaethol yw y logo cylchol sy’n ymddangos ar y datganiad i’r wasg hwn. (Mae’r logo "croesi bysedd" yn nod masnach ar gyfer y Loteri Genedlaethol ac nid yw felly at ddefnydd y Bwrdd Elusennau.)