21 Ionawr 2000

Bargyfreithwraig yn Gadeirydd y Bwrdd Elusennau yng Nghymru

Y Fargyfreithwraig Elisabeth Watkins yw Cadeirydd newydd Bwrdd Elusennau’r Loteri Genedlaethol yng Nghymru. Bu’n aelod o Bwyllgor Cymru a Phwyllgor Rhyngwladol y Bwrdd Elusennau er 1997. O Ionawr 2000 ymlaen, bydd yn olynu Tom Jones OBE fel Cadeirydd Pwyllgor Cymru.

Wedi dal swyddi pwysig dramor, dychwelodd Elisabeth Watkins i’r DG ym 1993. Mae’n Ddyfarnwraig Mewnfudo Arbennig a bu’n gadeirydd rhan-amser y Tribiwnlys Nawdd Cymdeithasol rhwng 1996 a 1998.

Ganwyd Mrs Watkins (nee Arfon-Jones), sy’n rhugl yn y Gymraeg, yng Nghaerdydd ac y mae’n awr yn byw gyda’i gwr, Brian, a’r ferch, Caroline, yng Nghas-gwent. Cafodd ei haddysg yn ysgolion cynradd Bryn Taf, Rhiwbina a Llanbadarn; Ysgol Ramadeg Ardwyn, Aberystwyth; Ysgol Ramadeg i Ferched Grove Park, Wrecsam; a derbyniodd Ddiploma mewn Llenyddiaeth Ffrangeg yn Sorbonne, Paris ym 1968. Ym 1971 graddiodd yng Ngholeg Prifysgol Llundain ac fe’i galwyd i’r Bar ym 1972 gan Gray’s Inn, ble’r oedd yn Ysgolor William Shaw.

Wrth siarad am ei phenodiad newydd, dywedodd "Mae hwn yn amser cyffrous i fod yn Gadeirydd y Bwrdd Elusennau yng Nghymru. Yn y Mileniwm newydd, a gyda Cynulliad Cymreig yn canolbwyntio’n fanwl ar faterion yn ymwneud ag anfantais yng Nghymru, rwy’n disgwyl gweld cyfnod newydd o syniadau a thwf yn y sector gwirfoddol. Mae’r seiliau cadarn a osodwyd gan y Cadeirydd blaenorol, Tom Jones, a gwaith arbennig y swyddfa yn y Drenewydd, yn ogystal â chefnogaeth ac ymateb y sector gwirfoddol, yn rhoi rheswm i mi edrych ymlaen at gyfnod cyffrous i’r Bwrdd Elusennau yng Nghymru. Fy mwriad yw parhau â llwyddiannau Tom a’r tîm gan sicrhau fod y Bwrdd Elusennau yn dal i chwarae rhan amlwg mewn bywyd cyhoeddus a chymunedol yng Nghymru."

Mae profiad rhyngwladol Mrs Watkins yn cynnwys treulio sawl blwyddyn ym Mermwda ble penodwyd hi’n Gofrestrydd y Goruchaf Lys ac yn Gofrestrydd y Llys Apêl, ar ôl gyrfa ddisglair yn Gwnsler y Goron. Symudodd Mrs Watkins gyda’i gwr a oedd gynt yn Brif Gonswl Prydeinig ac yna’n Uchel Gomisiynydd, i Bacistan, Canada a Swaziland gan wneud gwaith i fudiadau gwirfoddol ym mhob gwlad yn cynnwys cadeirio Pwyllgor Rhyngwladol Croes Goch Columbia Brydeinig a bod yn gadeirydd a sefydlwraig Hosbis Swaziland Gartref.

Mae ei gweithgareddau gwirfoddol yn y DG yn cynnwys y swyddi canlynol:

• Cadeirydd Lleyg Trefn Gwyno y Gwasanaeth Iechyd Gwladol yng Nghymru er 1995
• Aelod o’r Bwrdd Elusennau er 1997
• Aelod o’r grw^p ymgynghori gweinidogol ar gyfer Cynllun Cymuned Actif yr Adran Ddiwylliant, y Cyfryngau a Chwaraeon er 1999
• Ysgrifenyddes Anrhydeddus cymdeithas y Bargyfreithwragedd er 1999
• Aelod o Bwyllgor Etheg Ysbyty San Thomas, Llundain a Chadeirydd paneli cyfweld ar gyfer penodi meddygon ymgynghorol yn yr ysbyty

Ymhlith ei diddordebau mae’r celfyddydau perfformiadol, teithio a sgïo.

Nodiadau i Olygyddion

1. Ar gyfer ymholiadau i’r wasg, lluniau neu i drefnu cyfweliad a fyddech gystal â galw Hanna neu Myrddin ar 01286 675221.
2. Mae Bwrdd Elusennau’r Loteri Genedlaethol yn gorff annibynnol a sefydlwyd gan y Senedd er mwyn rhannu arian i gefnogi mudiadau elusennol, llesiannol a dyngarol. Mae 17 o aelodau ar y Bwrdd, yn cynnwys y Cadeirydd. Penderfynir ar grantiau gan aelodau mewn pwyllgorau dyfarnu grantiau yng Nghymru, Lloegr, yr Alban, Gogledd Iwerddon a’r DG gyfan.
3. Mae dwy brif raglen grantiau y Bwrdd Elusennau: Gweithredu cymunedol a Thlodi a difreintedd, yn ogystal â’r Grantiau bychain yn cael eu hasesu gan Bwyllgor Cymru. Aelodau’r Bwrdd yng Nghymru yw Elisabeth Watkins (Cadeirydd), Tom Jones a Jeff Carroll. Aelodau Cyfetholedig y Bwrdd yng Nghymru yw Margaret Dennis, Aled Siôn a Dr Glyn Williams.
   Prif nod y Bwrdd yw rhoi grantiau er mwyn ateb anghenion y rhai mwyaf difreintiedig yn ein cymdeithas a gwella ansawdd bywyd yn y gymuned.
   Er mis Hydref 1995, mae’r Bwrdd Elusennau, o dan ei brif grantiau, wedi dyfarnu dros £79 miliwn i 891 o grwpiau yng Nghymru. Mae dros £3.5 miliwn wedi ei ddyfarnu i 1517 o grwpiau o dan Grantiau bychain. Mae’r cyfanswm a ddyfarnwyd yng Nghymru, dros bum mlynedd, yn fwy na £83 miliwn.

Nodyn i Ddylunwyr

1. Logo Bwrdd Elusennau’r Loteri Genedlaethol yw y logo cylchol sy’n ymddangos ar y datganiad i’r wasg hwn. (Marc masnachu y Loteri Genedlaethol yw’r logo ‘croesi bysedd’ ac nid yw felly at ddefnydd y Bwrdd Elusennau.)