6 Rhagfyr 1999

Y Bwrdd Elusennau’n gloywi gaeaf yr henoed

Wrth i grwpiau henoed herio misoedd diflas y gaeaf, rhoddir pwyslais amlwg ar weithgarwch ac adloniant. Mae’r grantiau a ddyfarnwyd gan Fwrdd Elusennau’r Loteri Genedlaethol yng Nghymru heddiw’n dangos fod henoed yn bwriadu cadw’n brysur, trwy weithgareddau’n amrywio o ‘bingo’ i hyfforddiant cymorth cyntaf, o wibdeithiau neu wyliau i ginio neu sioe Nadolig.

Dywedodd Tom Jones, Cadeirydd y Bwrdd yng Nghymru, "O Gaerffili i Gasnewydd ac o Rondda Cynon Taf i Abertawe, ymddengys y bydd yr henoed yn Ne Cymru yn arbennig o brysur y gaeaf hwn. Mewn ardaloedd yng Nghanolbarth a Gogledd Cymru ar y llaw arall, megis Ceredigion, Conwy, Sir y Fflint, a Gwynedd rhoddir pwyslais ar gadw plant ifanc yn brysur a chefnogi canolfannau cymunedol. Mae’r grantiau a ddyfarnwyd gan y Bwrdd Elusennau, trwy ddiffiniad, yn adlewyrchiad o weithgareddau’r sector gwirfoddol a gallant amrywio o fis i fis ac o’r naill ardal i’r llall. Mae grantiau heddiw’n galonogol gan eu bod yn adlewyrchu’r camau cadarnhaol y mae grwpiau’n eu cymryd er mwyn cyfoethogi bywyd mewn cymunedau."

Dyfarnwyd cyfanswm o £112,291 i 37 o grwpiau yng Nghymru heddiw. Mae gwerth Grantiau bychain yn amrywio o £500 i £5,000 ac fe’u dyfernir i grwpiau a chanddynt incwm blynyddol o lai na £15,000.

Mae adnewyddu adeiladau cymunedol amrywiol, prynu offer chwarae newydd ar gyfer plant, datblygu teuluoedd a chymunedau, a phrosiect cyffrous i ganfod beth yw barn pobl ifanc am ddatblygiad canolfan adnoddau yng Nghastell Nedd Port Talbot, hefyd ymhlith blaenoriaethau’r grwpiau gwirfoddol a ddaeth i’r amlwg yn sgil grantiau heddiw.

Y grwp ar gyfer Cymru gyfan a dderbyniodd grant oedd ‘Tools for Self Reliance’ Cymru sydd wedi ei leoli yng Nghrucywel. Mae’r grwp yn adnewyddu offer er mwyn eu defnyddio mewn gwledydd sy’n datblygu ac eleni mae’n cynnal cynhadledd i ddathlu ei ben-blwydd yn 21ain. Bydd y grant o £2,300 yn talu ffïoedd siaradwyr ac yn sybsideiddio costau teithio’r anabl neu rai ar incwm isel fydd yn dod i’r gynhadledd.

Dywedodd Roy Norris, Cyfarwyddwr y Bwrdd yng Nghymru, "Wedi dyfarnu bron 1,500 o Grantiau bychain yng Nghymru hyd yma, mae’n amlwg ers tro mor boblogaidd yw’r cynllun grantiau hwn er mwyn ariannu prosiectau bychain ar unwaith. Mae nifer yn manteisio ar y cynllun i ariannu gweithgareddau Milflwyddol yn y misoedd nesaf ond wrth gwrs, mae’r cynllun yn ymestyn ymhellach na’r Mileniwm, a bydd yn parhau i ariannu a diwallu anghenion amrywiol y sector gwirfoddol. Anogir grwpiau i wneud cais gan gofio fod un o bob dau cais am Grantiau bychain – ar gyfartaledd – yn llwyddiannus.

Dylai grwpiau sy’n awyddus i gael ffurflenni cais ar gyfer grantiau’r Bwrdd Elusennau neu ragor o wybodaeth ffonio 0845 7273273.

Nodiadau i Olygyddion

1. Ar gyfer ymholiadau i’r wasg neu rifau cyswllt y grwpiau a fyddech gystal â galw Hanna neu Myrddin ar 01286 675221.
2. Mae Bwrdd Elusennau’r Loteri Genedlaethol yn gorff annibynnol a sefydlwyd gan y Senedd er mwyn rhannu arian i gefnogi mudiadau elusennol, llesiannol a dyngarol. Mae 17 o aelodau ar y Bwrdd, yn cynnwys y Cadeirydd. Penderfynir ar grantiau gan aelodau mewn pwyllgorau dyfarnu grantiau yng Nghymru, Lloegr, yr Alban, Gogledd Iwerddon a’r DG gyfan.
3. Mae dwy brif raglen grantiau y Bwrdd Elusennau: Gweithredu cymunedol a Thlodi a difreintedd, yn ogystal â’r Grantiau bychain yn cael eu hasesu gan Bwyllgor Cymru. Aelodau’r Bwrdd yng Nghymru yw Tom Jones (Cadeirydd), Elisabeth Watkins a Jeff Carroll. Aelodau Cyfetholedig y Bwrdd yng Nghymru yw Margaret Dennis, Aled Siôn a Dr Glyn Williams.
4. Prif nod y Bwrdd yw rhoi grantiau er mwyn ateb anghenion y rhai mwyaf difreintiedig yn ein cymdeithas a gwella ansawdd bywyd yn y gymuned.
5. Er mis Hydref 1995, mae’r Bwrdd Elusennau, o dan ei brif grantiau, wedi dyfarnu dros £79 miliwn i 891 o grwpiau yng Nghymru. Mae dros £3.5 miliwn wedi ei ddyfarnu i 1517 o grwpiau o dan Grantiau bychain. Mae’r cyfanswm a ddyfarnwyd yng Nghymru, dros bum mlynedd, yn fwy na £83 miliwn.
6. Cyhoeddir rhestr lawn o grantiau’r Bwrdd Elusennau ar y we ar www.nlcb.org.uk a chyhoeddir rhestr lawn o grantiau holl ddosbarthwyr y Loteri ar www.lottery.culture.gov.uk.

Nodyn i Ddylunwyr

1. Logo Bwrdd Elusennau’r Loteri Genedlaethol yw y logo cylchol sy’n ymddangos ar y datganiad i’r wasg hwn. (Marc masnachu y Loteri Genedlaethol yw’r logo ‘croesi bysedd’ ac nid yw felly at ddefnydd y Bwrdd Elusennau.)