22 Hydref 1998

Bwrdd Elusennau’r Loteri Genedlaethol yn cyhoeddi Adroddiad Blynyddol

Heddiw, cyflwynwyd Adroddiad Blynyddol Bwrdd Elusennau’r Loteri Genedlaethol gerbron y Senedd. Mae’r Adroddiad yn edrych ar y flwyddyn o 1 Ebrill 1997 hyd 31 Mawrth 1998.

Yn y flwyddyn 1997/98, mae’r Bwrdd wedi:

• dyfarnu 6,837 o grantiau i elusennau a grwpiau cymunedol, gan wneud cyfanswm o £333 miliwn (£18.4 miliwn i 560 o brosiectau yng Nghymru)
• cyflwyno ei raglen gyntaf o grantiau parhaus, ar y thema Gweithredu Cymunedol, gan alluogi grwpiau i wneud cais ar unrhyw adeg a chael penderfyniadau cyflymach am raglenni grantiau
• cyflwyno rhaglen grantiau yn benodol ar gyfer prosiectau iechyd ac ymchwil cymdeithasol
• treialu’r Cynllun Grantiau Bychain, sydd wedi’i anelu at grwpiau bychan, gan ddefnyddio system ymgeisio mwy syml
• arwain y ffordd yn y gwaith o ddatblygu cynllun Awards for All yn yr Alban, sy’n darparu ‘siop-un-stop’ ar gyfer gwneud ceisiadau am grantiau bychain i gyrff dosbarthu gwahanol y Loteri.
• cyhoeddi grantiau i fudiadau gwirfoddol sy’n gweithio dramor ond sydd â’u swyddfeydd ym Mhrydain

Dywedodd David Sieff, Cadeirydd, Bwrdd Elusennau’r Loteri Genedlaethol,: "Yn y flwyddyn hyd at 31 Mawrth 1998, mae’r Bwrdd Elusennau wedi datblygu agwedd newydd tuag at ddyfarnu grantiau. Rydym wedi cyflwyno amrywiaeth o raglenni eang, parhaus yn ogystal â rhaglenni arbenigol sydd ag amserlen ymgeisio benodol. Rydym wedi’i gwneud hi’n haws i grwpiau cymunedol lleol wneud cais am arian trwy ein Cynllun Grantiau Bychain. Rydym hefyd wedi arloesi gyda’n Awards for All yn yr Alban - y cynllun grantiau bychain ‘siop-un-stop’ cyntaf, er mwyn ei gwneud hi’n haws i grwpiau bach wneud cais am arian a godwyd gan y Loteri Genedlaethol. Fe fydd y rhaglenni hyn yn ein galluogi i wneud mwy er mwyn helpu’r rhai hynny sydd o dan yr anfantais fwyaf ac er mwyn gwella ansawdd bywyd yn y gymuned.

"Yn ystod y flwyddyn ddiwethaf, mae’r Bwrdd wedi cydweithio’n agos gyda’r Adran Diwylliant, Cyfryngau a Chwaraeon yn y gwaith o ddrafftio a datblygu’r Papur Gwyn a’r ddeddfwriaeth ddiweddarach ar ‘Loteri’r Bobl’. Roeddem yn hynod falch fod y mesurau newydd yn adlewyrchu nifer o’r polisïau yr ydym wedi eu mabwysiadu ers 1995.

"Ers sefydlu’r Bwrdd bedair blynedd yn ôl, rydym wedi ymgynghori’n eang gyda’r sector gwirfoddol. O dan Ddeddf y Loteri Genedlaethol 1996, mae gofyn i ni gynhyrchu Cynllun Strategol i’w gyflwyno gerbron yr Ysgrifennydd Gwladol yn ystod y Gwanwyn nesaf. Fe fydd ein cyfnod Ymgynghorol cyfredol wedi dod i ben erbyn Ionawr 1999 ac fe fydd y canlyniadau yn cael eu cynnwys yn y Cynllun Strategol.

"Mae’r Bwrdd wedi datblygu safonau uchel o ran asesu ceisiadau yn wrthrychol wrth ddyfarnu grantiau sydd wedi cael cymeradwyaeth gan y sector gwirfoddol. Er budd y sector, ac er mwyn defnyddio arian y Loteri ar gyfer sicrhau’r manteision gorau i’r rhai hynny sydd mewn angen, rydym yn credu ei bod hi’n hanfodol fod y Bwrdd yn parhau’n annibynnol.

Ymholiadau gan y cyfryngau: Robert Blow 0171 747 5227