3 Rhagfyr 1997

Bwrdd Elusennau’r Loteri Genedlaethol Yn Cefnogi - Elusennau A Grwpiau Cymuned Bychain Yng Nghymru

Datgelodd Bwrdd Elusennau’r Loteri Genedlaethol ei ddull newydd o ddyfarnu grantiau heddiw yn dilyn ymgynghoriad eang gyda’r sector gwirfoddol. Datgelwyd y cynlluniau mewn taflen newydd ‘Rhaglenni grantiau newydd’ a gyhoeddwyd heddiw ac y gellir cael copi ohoni drwy ffonio 0345 273273.

Mae newidiadau allweddol yn cynnwys:

• cynnig mwy o ddewis i elusennau - amrywiaeth o raglenni grantiau yn cwrdd ag anghenion y mwyafrif o fudiadau’r sector gwirfoddol
• rhoi mwy o hyblygrwydd i grwpiau - ni fydd dyddiadau cau ar gyfer ceisiadau a gall grwpiau wneud cais i fwy nag un rhaglen
• cyhoeddi grantiau yn amlach fel bod grwpiau yn clywed y canlyniad yn gynt
• cyfleoedd pellach i grwpiau gynnal mwy nag un grant.

Eglurodd Timothy Hornsby, Prif Weithredwr y Bwrdd: ‘Bydd y cyfle cyntaf i grwpiau gael budd o’n dull newydd o ddyfarnu grantiau o dan ein rhaglen grantiau newydd, Gweithredu cymunedol. Mae’r llinell gais yn agor ar 19 Ionawr 1998. Fe fydd yn ariannu prosiectau sy’n cefnogi gweithgareddau cymunedol, yn ogystal â phrosiectau i wneud cymunedau yn fwy diogel i fyw ynddynt.

‘Erbyn yr haf, bydd modd gwneud ceisiadau ar gyfer ail brif raglen grantiau, sef Tlodi. Bydd y ddwy brif raglen grantiau hyn ar agor ar yr un pryd a gall mudiadau wneud cais i’r ddwy raglen yma am arian ar gyfer prosiectau gwahanol.

‘Yn ychwanegol, bydd rhaglenni arbennig eraill yn cynnig grantiau i grwpiau cymunedol, prosiectau ymchwil iechyd a chymdeithasol a mudiadau wedi eu lleoli yn y DG yn gweithio dramor. Mae ein taflen newydd yn egluro pryd y gall grwpiau wneud cais a’r math o brosiectau a fydd yn cael eu hariannu.’

Mae dros 3,000 o elusennau bychain eisoes wedi derbyn £8 miliwn o dan y rhaglen beilot Cynllun grantiau bychain yn yr Alban, Cymru, Gogledd Ddwyrain a De Orllewin Lloegr. Bydd y cynllun yn cael ei ymestyn i weddill y DG erbyn haf 1998.

Eglurodd Timothy Hornsby: ‘Yr ydym wedi dyfarnu dros £680 miliwn yn barod i 12,000 o brosiectau cymunedol lleol wedi eu rhedeg gan sgowtiaid a geidiaid, clybiau henoed, clybiau hunan gymorth, grwpiau pobl anabl, ysgolion meithrin, neuaddau pentref a chlybiau ar ôl ysgol. Gobeithiwn y bydd y rhaglenni newydd hyn yn parhau â’n hymdrechion blaenorol ac yn hwyluso’r dasg o wneud cais am grant gan y Bwrdd Elusennau.’

Ychwanegodd: ‘Mae modd gwneud cais i’r Bwrdd Elusennau os ydi’r mudiad wedi ei sefydlu i helpu eraill. Nid oes yn rhaid i chi fod yn elusen gofrestredig i wneud cais.’

Mae’r Bwrdd Elusennau yn cydweithio’n agos gyda thri arall o ddosranwyr arian y Loteri mewn menter newydd, sef Cyngor Celfyddydau’r Alban, Cyngor Chwaraeon yr Alban a Chronfa Treftadaeth y Loteri, i ddatblygu rhaglen grantiau cymunedol yn yr Alban.