Gweld sêr a dawnsio gyda grantiau’r Bwrdd Elusennau

Bydd aelodau ‘Youth Watch’ Pen y Dre, Rhymni, yn dawnsio i’r caneuon diweddara yn sgil grant o £5,000 a ddyfarnwyd ar gyfer offer disgo; tra bydd grant arall o £5,000 yn cael ei ddefnyddio i brynu telesgôp a fydd yn galluogi Cymdeithas Astronomaidd Abertawe i weld rhagor o sêr. Bydd cerddoriaeth hefyd yn rhan o ddathliadau canmlwyddiant y gymuned Somalïaidd yng Nghymru sy’n cael eu trefnu gan Gymdeithas Addysg, Diwylliant a Chelfyddyd Affro-Geltaidd, (Caerdydd) a dderbyniodd grant o £4,920.

Roedd cyfanswm y grantiau, a ddyfarnodd Bwrdd Elusennau’r Loteri Genedlaethol i 93 o grwpiau heddiw, yn £290,799.

Eglurodd Tom Jones, Cadeirydd y Bwrdd Elusennau yng Nghymru: "Mae’r grantiau hyn heddiw’n adlewyrchu cyfraniad y Bwrdd Elusennau i w^yl y Mileniwm yng Nghymru. Bydd rhai o’r prosiectau yn rhoi ansawdd ac amrywiaeth i fywyd cymunedol, sy’n un ffordd o ddathlu’r Mileniwm. Fodd bynnag, mae’r Mileniwm hefyd yn gatalydd cryf i ni i adnewyddu ein hymroddiad i helpu’r rhai sydd dan anfantais, felly mae’n galonogol i weld cynifer o brosiectau a fydd yn ennyn gobaith newydd i’r rhai dan anfantais wrth i ni gamu i mewn i’r Mileniwm newydd."

Y grwpiau llwyddiannus sy’n gwasanaethu Cymru gyfan yw Plant sy’n Dioddef Effaith Bwlio (CURB), sy’n derbyn grant o £3,721 i wella cyfleusterau ei swyddfa; a Chymdeithas Cyneclampsaidd Tocsemia sy’n derbyn £3,589 tuag at offer i ddarparu gwybodaeth am iechyd. Mae defnydd o gyfrifiaduron yn elfen o nifer o’r grantiau eraill a ddyfarnwyd megis £2,040 i Fforwm Anabledd Sir Ddinbych, £1,130 i Gymdeithas Hunan-gymorth Aberhonddu ar gyfer y Di-waith, a £4,240 i Gyfrifiaduron yn y Gymuned yng Nghaerdydd. Dywedodd Roy Norris, Cyfarwyddwr y Bwrdd Elusennau yng Nghymru: "Mae’r Grantiau bychain sy’n amrywio o £500 i £5,000 yn boblogaidd iawn yng Nghymru oherwydd y ffurflen gais syml a’r broses gyflym o ddosrannu arian. Ein nod yw rhoi cyfle cyfartal i ymgeiswyr trwy ddarparu llinell ymholiadau, cyhoeddi canllawiau cynhwysfawr, cynnal seminarau a chynnig ymateb i ymgeiswyr aflwyddiannus. Mae cyngor annibynnol gwerthfawr hefyd ar gael, yn rhad ac am ddim, i grwpiau cymunedol neu wirfoddol, trwy eu Gwasanaeth Gwirfoddol Sirol lleol."

Dylai grwpiau sydd eisiau ffurflenni cais ar gyfer grantiau’r Bwrdd Elusennau neu ragor o wybodaeth ffonio 0345 273273.

Nodiadau i Olygyddion

1. Ar gyfer ymholiadau i’r wasg neu gyswllt â’r grwpiau a fyddech gystal â galw Hanna neu Myrddin ar 01286 675221.
2. Mae Bwrdd Elusennau’r Loteri Genedlaethol yn gorff annibynnol a sefydlwyd gan y Senedd er mwyn rhannu arian i gefnogi mudiadau elusennol, llesiannol a dyngarol. Mae 17 o aelodau ar y Bwrdd, yn cynnwys y Cadeirydd. Penderfynir ar grantiau gan aelodau mewn pwyllgorau dyfarnu grantiau yng Nghymru, Lloegr, yr Alban, Gogledd Iwerddon a’r DG gyfan.
3. Gwneir dyfarniadau yng Nghymru ar gyfer rhaglenni’r Bwrdd Elusennau, Gweithredu cymunedol a Thlodi a difreintedd, yn ogystal â’r Grantiau bychain, gan Bwyllgor Cymru. Yr aelodau o’r Bwrdd yng Nghymru yw Tom Jones (Cadeirydd), Elisabeth Watkins a Jeff Carroll. Yr Aelodau Cyfetholedig o’r Bwrdd yw Margaret Dennis, Aled Siôn a Dr Glyn Williams.
4. Prif nod y Bwrdd yw rhoi grantiau er mwyn ateb anghenion y rhai mwyaf difreintiedig yn ein cymdeithas a gwella ansawdd bywyd yn y gymuned.
5. Er mis Hydref 1995, mae’r Bwrdd Elusennau, o dan ei brif grantiau, wedi dyfarnu dros £74 miliwn i 857 o grwpiau yng Nghymru. Mae dros £3.5 miliwn wedi ei ddyfarnu i 1427 o grwpiau o dan Grantiau bychain. Mae’r cyfanswm a ddyfarnwyd yng Nghymru, dros bum mlynedd, yn fwy na £77 miliwn.

Nodyn i Ddylunwyr

Logo Bwrdd Elusennau’r Loteri Genedlaethol yw y logo cylchol a welir ar y datganiad yma i’r wasg. (Marc masnachu y Loteri Genedlaethol yw’r logo ‘croesi bysedd’ ac nid yw felly at ddefnydd y Bwrdd Elusennau.)